ಯಾರು ಈ ವಿ.ಭಟ್, ಆರ್‌ಬಿ, ಸಂಜಯ ಸರ್? ಏನಿದರ ಹಕೀಕತ್ತು?

ಪ್ರಜಾವಾಣಿ ಮತ್ತು ಡೆಕ್ಕನ್ ಹೆರಾಲ್ಡ್‌ಗಳು ಇವತ್ತು ಸ್ಫೋಟಿಸಿರುವ ಗಣಿಕಪ್ಪ ಕುರಿತ ಸುದ್ದಿಗಳು ಇಡೀ ಪತ್ರಿಕಾರಂಗದಲ್ಲಿ ದೊಡ್ಡ ಪ್ರಮಾಣದ ಬಿಸಿಬಿಸಿ ಚರ್ಚೆಗೆ ಕಾರಣವಾಗಿದೆ. ಎಲ್ಲೆಡೆ ಗುಸುಗುಸು ಚರ್ಚೆ. ಎಸ್‌ಎಂಎಸ್‌ಗಳ ವಿನಿಮಯ. ಪತ್ರಕರ್ತರು ಅಣ್ಣಾ ಹಜಾರೆ ಚಳವಳಿಯ ಬಗ್ಗೆ ಮಾತಾಡೋದನ್ನು ಬಿಟ್ಟು ಪ್ರಜಾವಾಣಿ ಸುದ್ದಿಯನ್ನೇ ಎಲೆಅಡಿಕೆ ಅಗಿದಂತೆ ಅಗಿದು ನುಂಗುತ್ತಿದ್ದಾರೆ.

ಅಕ್ರಮ ಗಣಿಗಾರಿಕೆ ಕುರಿತ ಲೋಕಾಯುಕ್ತ ವರದಿ ಬಹಿರಂಗ ಆದ ನಂತರ ಯಡಿಯೂರಪ್ಪ ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕಾಯಿತು. ವರದಿಯಲ್ಲಿ ಇದುವರೆಗೆ ಬಹಿರಂಗವಾಗದೇ ಉಳಿದಿದ್ದ ಭಾಗಗಳು (ಯು.ವಿ ಸಿಂಗ್ ನೇತೃತ್ವದ ತಂಡದ ತನಿಖಾ ವರದಿ) ಈಗ ಹೊರಬಂದಿವೆ. ಡೆಕ್ಕನ್ ಹೆರಾಲ್ಡ್ ಮತ್ತು ಪ್ರಜಾವಾಣಿ ಪತ್ರಿಕೆಗಳು ಈ ಕುರಿತ ಸುದ್ದಿಗಳನ್ನು ಪ್ರಕಟಿಸುತ್ತಿವೆ.

ಎರಡು ದಿನಗಳಿಂದ ಅಕ್ರಮ ಗಣಿಗಾರಿಕೆಯ ಪಾಲುದಾರರಿಂದ ಯಾರು ಯಾರಿಗೆ ಹಣ ಹೋಗಿದೆ ಎಂಬ ಮಾಹಿತಿ ಈ ಪತ್ರಿಕೆಗಳ ವರದಿ ಮೂಲಕ ಗೊತ್ತಾಗಿದೆ. ಡೆಕ್ಕನ್ ಹೆರಾಲ್ಡ್ ಇದುವರೆಗೆ ೨೦೦ ಅಧಿಕಾರಿಗಳ ಪಟ್ಟಿ ಪ್ರಕಟಿಸಿದೆ. ಜನಾರ್ದನ ರೆಡ್ಡಿ ಮತ್ತವರ ಸಂಗಡಿಗರು ಬೇನಾಮಿ ಹೆಸರಿನಲ್ಲಿ ವ್ಯವಹಾರ ನಡೆಸುತ್ತಿರುವುದು ಎಲ್ಲರಿಗೂ ಗೊತ್ತಿರುವ ಸಂಗತಿ. ಕಾರದಪುಡಿ ಮಹೇಶ್ ಮತ್ತು ಮಧುಕುಮಾರ್ ವರ್ಮಾ ಲೋಕಾಯುಕ್ತ ವರದಿ ಪ್ರಕಾರ ಅಕ್ರಮ ಗಣಿಗಾರಿಕೆಯಲ್ಲಿ ತೊಡಗಿರುವವರು. ಅವರ ಮೂಲಕ ಹಣ ಸಂದಾಯವಾದ ಬಗ್ಗೆ ಮಾಹಿತಿಯನ್ನು ಐಟಿ ಅಧಿಕಾರಿಗಳು ಸಂಗ್ರಹಿಸಿದ ದಾಖಲೆಗಳನ್ನು ಲೋಕಾಯುಕ್ತ ಅಧಿಕಾರಿಗಳೊಂದಿಗೆ ಹಂಚಿಕೊಂಡಿದ್ದಾರೆ.

ಆ ಪರಿಣಾಮ ಈ ಹೆಸರುಗಳೆಲ್ಲಾ ಹೊರಬಂದಿದೆ. ದಿನಾಂಕ ಜುಲೈ ೩೧, ೨೦೧೦ ರಂದು ಆರ್.ಬಿ ಎನ್ನುವವರಿಗೆ ಮಧುಕುಮಾರ್ ವರ್ಮಾನಿಂದ ೧೦ ಲಕ್ಷ ರೂ ಸಂದಾಯವಾಗಿದೆ. ನಂತರ ವಿ.ಭಟ್ ಎನ್ನುವವರಿಗೆ ಆಗಸ್ಟ್ ೪ ರಂದು ೨೫ ಲಕ್ಷ ರೂ ಹಾಗೂ ಐದು ದಿನಗಳ ನಂತರ (ಆಗಸ್ಟ್ ೯) ರಂದು ಮತ್ತೆ ೫೦ ಲಕ್ಷ ರೂ ಸಂದಾಯವಾಗಿದೆ. ಆಗಸ್ಟ್ ೩೧ ರಂದು ಡೆಕ್ಕನ್ ಕ್ರಾನಿಕಲ್‌ಗೆ ೨೫ ಲಕ್ಷ ರೂ ಸಂದಾಯವಾಗಿದೆ. ಬೆಂಗಳೂರಿನ ಸ್ಥಳೀಯ ಪತ್ರಿಕೆಗಳಿಗೆ ಸಂಜಯ್ ಸರ್ ಎಂಬುವವರ ಮೂಲಕ ೧.೫೨ ಲಕ್ಷ ರೂ ಸಂದಾಯವಾಗಿದೆ. ಅದೇ ದಿನ ಪ್ರೆಸ್ ಕ್ಲಬ್‌ಗೆ ಐದು ಲಕ್ಷ ಕೊಡಲಾಗಿದೆ. ಪತ್ರಿಕೆಗಳಿಗೆ ಪಾವತಿಯಾಗಿದ್ದು ಜಾಹೀರಾತು ಹಣವಾ? ಅಥವಾ ಬೇರಿನ್ನೇನಾದರೂ ಇರಬಹುದೇ? ಡೆಕ್ಕನ್ ಕ್ರಾನಿಕಲ್‌ನವರು ಸೂಕ್ತ ಸ್ಪಷ್ಟನೆ ನೀಡುವರೆ? ಒಂದು ವೇಳೆ ಕ್ರಾನಿಕಲ್‌ನವರು ಹಣ ಪಡೆಯದಿದ್ದರೆ, ಅವರ ಹೆಸರಲ್ಲಿ ಹಣ ಪಡೆದವರು ಯಾರು?

ಯಾರ‍್ಯಾರಿಗೆ ಹಣ ಪಾವತಿಯಾಗಿದೆ ಎಂಬ ಪಟ್ಟಿಯ ವಿಶ್ವಾಸಾರ್ಹತೆಯ ಬಗ್ಗೆಯೂ ಪ್ರಶ್ನೆಗಳು ಏಳುವುದು ಸಹಜ. ಆದರೆ ಈ ಪೈಕಿ ಬೆಂಗಳೂರು ಪ್ರೆಸ್ ಕ್ಲಬ್ ಪಡೆದ ಐದು ಲಕ್ಷ ರೂ. ಹಣ ನಿಖರವಾಗಿ ಸಾಬೀತಾಗಿದೆ. ಪ್ರೆಸ್‌ಕ್ಲಬ್‌ಗೆ ೪೦ ವರ್ಷ ತುಂಬಿದ ಸಂದರ್ಭದಲ್ಲಿ ೬೦ ಮಂದಿ ಪತ್ರಕರ್ತರಿಗೆ ಸನ್ಮಾನಿಸಲಾಯಿತು. ಈ ಪತ್ರಕರ್ತರ ನೆನಪಿನ ಕಾಣಿಕೆ (ಬೆಳ್ಳಿ ತಟ್ಟೆ)ಗಾಗಿ ಈ ಹಣವನ್ನು ಬಳಸಿಕೊಳ್ಳಲಾಗಿತ್ತು. ಇದು ಅಧಿಕೃತವಾಗಿ ಕ್ಲಬ್‌ನ ಅಕೌಂಟುಗಳಲ್ಲಿ ದಾಖಲಾಗಿದೆ. ಪ್ರೆಸ್‌ಕ್ಲಬ್‌ನ ಕಳೆದ ಸರ್ವಸದಸ್ಯರ ಸಾಮಾನ್ಯ ಸಭೆಯಲ್ಲಿ ಈ ವಿಷಯವನ್ನು ಅಜೆಂಡಾಗೆ ತಂದಿದ್ದ ಕೆಲ ಪತ್ರಕರ್ತರು ಕ್ಲಬ್ ಆಡಳಿತ ಮಂಡಳಿಯನ್ನು ತರಾಟೆಗೆ ತೆಗೆದುಕೊಂಡಿದ್ದರು. ಗಣಿ ದಂಧೆಕೋರರಿಂದ ಡೊನೇಷನ್ ಪಡೆದು ಕ್ಲಬ್ ನಡೆಸಬೇಕಾದ ಅನಿವಾರ್ಯತೆ ಏನು ಎಂದು ಪ್ರಶ್ನಿಸಿದ್ದರು. ಕೊಡುಗೆ ನೀಡಿದ ಜನಾರ್ದನ ರೆಡ್ಡಿ ಪತ್ರಕರ್ತರ ಸನ್ಮಾನ ಕಾರ್ಯಕ್ರಮದಲ್ಲೂ ಉಪಸ್ಥಿತರಿದ್ದರು. ಆದರೀಗ ಕ್ಲಬ್‌ಗೆ ದೇಣಿಗೆ ನೀಡಿದ್ದು ಮಧುಶ್ರೀ ಎಂಟರ್‌ಪ್ರೈಸಸ್ ಎಂಬುದು ಪತ್ರಿಕೆಗಳ ವರದಿ ಮೂಲಕ ಬಯಲಾಗಿದೆ.

ಈ ಆರ್.ಬಿ, ವಿ.ಭಟ್, ಸಂಜಯ್ ಸರ್ - ಇವರೆಲ್ಲ ಯಾರು ಎನ್ನುವುದು ಸಹಜವಾಗಿಯೇ ಕುತೂಹಲದ ಸಂಗತಿ. ಆ ಕುತೂಹಲ ನಮಗೂ ಇದೆ. ಒಂದು ವರ್ಷದ ಹಿಂದೆ ಇಷ್ಟು ದೊಡ್ಡ  ಮೊತ್ತ (ಕೆಲವರಿಗೆ ಇದು ಪೀನಟ್ಸ್ ಅನ್ನಿಸಬಹುದು.) ರವಾನೆಯಾಗಿದ್ದು ಯಾವ ಕಾರಣಕ್ಕೆ ಎನ್ನುವುದೂ ಸಹ ನಿಗೂಢ. ಈ ಬಗ್ಗೆ ಏನಾದರೂ ತನಿಖೆ ನಡೆಯುತ್ತಾ? ಗೊತ್ತಿಲ್ಲ.

ಇವತ್ತು ದೇಶಾದ್ಯಂತ ಭ್ರಷ್ಟಾಚಾರದ ವಿರುದ್ಧ ದೊಡ್ಡ ಮಟ್ಟದ ಆಂದೋಲನವೇ ನಡೆಯುತ್ತಿದೆ. ಇದನ್ನು ಇಡೀ ಮೀಡಿಯಾ ಜಗತ್ತು ಒಂದೇ ಧ್ವನಿಯಲ್ಲಿ ಬೆಂಬಲಿಸುತ್ತಿದೆ. ದುರದೃಷ್ಟವೆಂದರೆ ಪತ್ರಕರ್ತರು ಲೋಕಾಯುಕ್ತದ ವ್ಯಾಪ್ತಿಗೂ ಬರೋದಿಲ್ಲ, ಅಣ್ಣಾ ಹಜಾರೆಯವರ ಜನಲೋಕಪಾಲದ ವ್ಯಾಪ್ತಿಗೂ ಬರೋದಿಲ್ಲ. ಹೀಗಾಗಿ ಬದನೇಕಾಯಿ ತಿನ್ನುತ್ತಲೇ ಆಚಾರ ಹೇಳುವುದು ಪತ್ರಕರ್ತರಿಗೆ ಬಹಳ ಸುಲಭ. ಅಣ್ಣಾ ಹಜಾರೆ ಜಿಂದಾಬಾದ್!

ಕೊನೆಮಾತು: ಈಗ್ಗೆ ಕೆಲವು ದಿನಗಳ ಹಿಂದೆ ೨೪/೭ ಸುದ್ದಿ ವಾಹಿನಿಯೊಂದರಲ್ಲಿ ಯಡಿಯೂರಪ್ಪ ವಿರುದ್ಧ ಕೇಳಿಬಂದ ಭ್ರಷ್ಟಾಚಾರ ಆರೋಪಗಳ ಬಗ್ಗೆ ಚರ್ಚೆ ನಡೆದಿತ್ತು. ಚರ್ಚೆಯಲ್ಲಿ ಭಾಗವಹಿಸಿದ್ದ ಉತ್ಸಾಹಿ ಪತ್ರಕರ್ತರೊಬ್ಬರು ಬಿಜೆಪಿ ನಾಯಕ ಎಲ್. ಕೆ. ಅಡ್ವಾಣಿಯವರ ಬಗ್ಗೆ ಮಾತನಾಡುತ್ತ - ಹವಾಲಾ ಹಗರಣದಲ್ಲಿ ಡೈರಿಯೊಂದರಲ್ಲಿ ತಮ್ಮ ಹೆಸರನ್ನು ಸೂಚಿಸಬಹುದಾದ ಸಂಕೇತಗಳು ಸ್ಫುಟವಾಗಿ (only initials) ನಮೂದಾಗಿದ್ದ ಕಾರಣಕ್ಕೆ ಅಡ್ವಾಣಿ, ಆರೋಪದಿಂದ ಮುಕ್ತನಾಗುವ ತನಕ ಚುನಾವಣಾ ರಾಜಕಾರಣದಿಂದ ದೂರ ಉಳಿದರು. ಅಂತಹ ನೈತಿಕತೆ ಈಗಿನ ಯಡಿಯೂರಪ್ಪನಿಗೆಲ್ಲಿದೆ ಎಂದು ಟೀಕಿಸಿದ್ದರು. ಆ ಮಾತು ಇಂದು ಅದೇಕೋ ನೆನಪಾಯಿತು.