ಪಬ್ಲಿಕ್ ಟಿವಿಯ ಮೂಲಕ ರಂಗಣ್ಣ ಆಕ್ಟಿವಿಸಂ ಮಾಡಲಿದ್ದಾರೆಯೇ?

ಕನ್ನಡ ಮಾಧ್ಯಮ ರಂಗದಲ್ಲಿ ಈ ವರ್ಷ ನಿರೀಕ್ಷಿಸಲಾಗುತ್ತಿರುವ ಎರಡು ಮಹತ್ವದ ಬೆಳವಣಿಗೆಗಳಲ್ಲಿ ಒಂದರ ಮುಹೂರ್ತ ನಾಳೆಗೆ ನಿಗದಿಯಾಗಿದೆ. ವಿಜಯ ಸಂಕೇಶ್ವರರ ಬಹುನಿರೀಕ್ಷಿತ ವಿಜಯವಾಣಿ ಪತ್ರಿಕೆಯ ಆರಂಭ ಇನ್ನೇನು ಸದ್ಯದಲ್ಲೇ ಆಗಲಿದೆ. ಅದಕ್ಕೂ ಮುನ್ನ ನಾಳೆ (ಫೆಬ್ರವರಿ ೧೨) ಪತ್ರಕರ್ತ ಎಚ್.ಆರ್.ರಂಗನಾಥ್ ಅವರ ಪಬ್ಲಿಕ್ ಟಿವಿ ಆರಂಭಗೊಳ್ಳುತ್ತಿದೆ. ಕನ್ನಡ ಮಾಧ್ಯಮ ರಂಗಕ್ಕೆ  ಇವೆರಡೂ ಹೊಸ ಸೇರ್ಪಡೆಗಳು. ಈ ಎರಡರ ಕುರಿತೂ ಮಾಧ್ಯಮ ರಂಗದಲ್ಲಿ ವಿಪರೀತ ನಿರೀಕ್ಷೆಗಳಿವೆ.

ಎಚ್.ಆರ್.ರಂಗನಾಥ್ ಪಬ್ಲಿಕ್ ಟಿವಿಯ ಪ್ರಧಾನ ಸಂಪಾದಕ ಮಾತ್ರವಲ್ಲ, ಪಬ್ಲಿಕ್ ಟಿವಿಯನ್ನು ಆರಂಭಿಸುತ್ತಿರುವ ರೈಟ್ ಮೆನ್ ಮೀಡಿಯಾ ಪ್ರೈವೇಟ್ ಲಿಮಿಟೆಡ್ ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕ ಹಾಗು ಅಧ್ಯಕ್ಷರೂ ಹೌದು. ಅರುಣ್ ಕುಮಾರ್ ಕಾರ್ಯ ನಿರ್ವಾಹಕ ಅಧಿಕಾರಿಯಾಗಿ, ದಿವಾಕರ್ ಉಪಾಧ್ಯಕ್ಷರಾಗಿ ಈ ಸಂಸ್ಥೆಯ ಹೊಣೆ ಹೊತ್ತಿದ್ದಾರೆ.

ಟಿವಿ ಚಾನಲ್‌ಗಳನ್ನು ಆರಂಭಿಸುವವರು ದೊಡ್ಡ ಪ್ರಮಾಣದ ಉದ್ಯಮಿಗಳೇ ಆಗಿರಬೇಕು ಎಂಬ ಮಾತಿದೆ. ಯಾಕೆಂದರೆ ಟಿವಿ ಚಾನಲ್ ಗಳದ್ದು ಬಕಾಸುರನ ಹೊಟ್ಟೆ. ಎಷ್ಟು ಹಣ ಸುರಿದರೂ ಅದು ತಿನ್ನುತ್ತದೆ. ಈ ಮಿಥ್ ಒಡೆಯುವ ಯತ್ನದಲ್ಲಿ ರಂಗನಾಥ್ ಇದ್ದಾರೆ. ಮೊದಲ ಬಾರಿಗೆ ಪತ್ರಕರ್ತನಾಗಿಯೇ ಈ ಸಾಹಸಕ್ಕೆ ಕೈಹಾಕಿದ್ದಾರೆ. ಚಾನಲ್‌ಗಳಿಗೆ ಹೂಡಲಾಗುವ ಬಂಡವಾಳ ಬೇಕಾಬಿಟ್ಟಿ ಸೋರಿಕೆಯಾಗುವುದೇ ಹೆಚ್ಚು. ಈ ದುಂದುವೆಚ್ಚವನ್ನು ತಡೆಗಟ್ಟಿದರೆ ದೊಡ್ಡ ಪ್ರಮಾಣದ ಬಂಡವಾಳ ಬೇಕಾಗಿಲ್ಲ ಎಂಬುದು ರಂಗನಾಥ್ ನಂಬುಗೆ. ಚಾನಲ್ ಕಟ್ಟುವ ಕೆಲಸದ ಜತೆಗೆ ರಂಗನಾಥ್ ಅದಕ್ಕೆ ಬೇಕಾದ ಬಂಡವಾಳವನ್ನೂ ಸಂಗ್ರಹಿಸಿ ಅಖಾಡಕ್ಕೆ ಇಳಿದಿದ್ದಾರೆ. ಇದು ಒಂದು ಬಗೆಯ ಸಾಹಸ. ಎಷ್ಟು ಪ್ರಮಾಣದಲ್ಲಿ ಯಶಸ್ಸು ಅವರಿಗೊಲಿಯುತ್ತದೆ ಎಂಬುದನ್ನು ಕಾದು ನೋಡಬೇಕು.

ಎಚ್.ಆರ್.ರಂಗನಾಥ್ ಕನ್ನಡಪ್ರಭದ ಸಂಪಾದಕರಾಗಿದ್ದಾಗ ರಾಜಕೀಯ ವಿಶ್ಲೇಷಕರಾಗಿ ನ್ಯೂಸ್ ಚಾನಲ್‌ಗಳ ಪ್ಯಾನೆಲ್‌ನಲ್ಲಿ ಬಂದು ಕೂರುತ್ತಿದ್ದರು. ಟಿವಿ ಮೀಡಿಯಾಗೆ ಹೇಳಿ ಮಾಡಿಸಿದ ವ್ಯಕ್ತಿ ಎಂದು ಸಾಕಷ್ಟು ಮಂದಿಗೆ ಅನ್ನಿಸಿದ್ದು ಸುಳ್ಳಲ್ಲ. ರಂಗನಾಥ್ ಕಡೆಗೊಮ್ಮೆ ಸುವರ್ಣ ನ್ಯೂಸ್ ಮುಖ್ಯಸ್ಥರಾಗಿ ಬಂದರು. ಒಂದಷ್ಟು ಜನಪ್ರಿಯತೆಯನ್ನೂ ಪಡೆದರು. ಸುವರ್ಣದಲ್ಲಿ ಅವರು ಹೆಚ್ಚು ಕಾಲ ಇರಲು ಸಾಧ್ಯವಾಗಲಿಲ್ಲ. ಹೊರಬಂದ ನಂತರ ಅವರ ತಲೆಹೊಕ್ಕಿದ್ದು ಪಬ್ಲಿಕ್ ಟಿವಿಯ ಕನಸು.

ಈಗಾಗಲೇ ಆರು ನ್ಯೂಸ್ ಚಾನಲ್ ಗಳು ಕನ್ನಡದಲ್ಲಿವೆ. ಟಿವಿ೯, ಉದಯ ನ್ಯೂಸ್, ಸುವರ್ಣ ನ್ಯೂಸ್, ಸಮಯ ನ್ಯೂಸ್, ಜನಶ್ರೀ ನ್ಯೂಸ್ ಹಾಗು ಕಸ್ತೂರಿ ನ್ಯೂಸ್‌ಗಳು ಚಾಲ್ತಿಯಲ್ಲಿವೆ. ಇವುಗಳ ನಡುವೆ ಏಳನೇ ಚಾನಲ್ ಆಗಿ ಪಬ್ಲಿಕ್ ಟಿವಿ ಬರುತ್ತಿದೆ. ಈ ಎಲ್ಲ ಚಾನಲ್‌ಗಳಿಗಿಂತ ಭಿನ್ನವಾಗಿ ಪಬ್ಲಿಕ್ ಟಿವಿ ಏನನ್ನಾದರೂ ಮಾಡಲು ಸಾಧ್ಯವೇ? ಟಿಆರ್‌ಪಿ ಕದನದಲ್ಲಿ ಪಬ್ಲಿಕ್ ಟಿವಿ ಗೆಲ್ಲಬಹುದೇ? ಕಾದು ನೋಡಬೇಕು.

ಹಿಂದೆ ಸುವರ್ಣ ನ್ಯೂಸ್ ನಲ್ಲಿದ್ದಾಗ ಪಬ್ಲಿಕ್ ವಾಯ್ಸ್ ಎಂಬ ಕಾರ್ಯಕ್ರಮವೊಂದನ್ನು ಎಚ್.ಆರ್.ರಂಗನಾಥ್ ನಡೆಸುತ್ತಿದ್ದರು. ವರ್ತಮಾನದ ಬೆಳವಣಿಗೆಗಳ ಕುರಿತು ಸಾರ್ವಜನಿಕರ ಜತೆ ಸಂವಾದಿಸುವ ಕಾರ್ಯಕ್ರಮ ಅದು. ಅದಕ್ಕೆ ಒಳ್ಳೆಯ ಪ್ರತಿಕ್ರಿಯೆಯೂ ಲಭ್ಯವಾಗಿತ್ತು. ರಂಗನಾಥ್ ಸಾರ್ವಜನಿಕರೊಂದಿಗೆ ಸಂವಾದವನ್ನೂ ಕೌನ್ಸಿಲಿಂಗ್ ಧಾಟಿಯಲ್ಲಿ ನಡೆಸಿ ರಾಜಕಾರಣ, ಪ್ರಚಲಿತ ವಿದ್ಯಮಾನಗಳು ಹಾಗು ಸಾಮಾಜಿಕ ಸಮಸ್ಯೆಗಳನ್ನು ವೀಕ್ಷಕರಿಗೆ ಅರ್ಥ ಮಾಡಿಸಲು ಯತ್ನಿಸುತ್ತಿದ್ದರು.

ಈಗ ರಂಗನಾಥ್ ಪಬ್ಲಿಕ್ ಟಿವಿಯ ಜತೆ ಬಂದಿದ್ದಾರೆ. ಆರಂಭದ ಜಾಹೀರಾತುಗಳನ್ನು ಗಮನಿಸಿದರೆ ತಮ್ಮ ಚಾನಲನ್ನು ಸಾರ್ವಜನಿಕರ ಟಿವಿಯನ್ನಾಗಿಸುವ ಉಮ್ಮೇದು ಅವರಿಗಿದ್ದಂತಿದೆ. ಇತರ ಚಾನಲ್‌ಗಳು ರಾಜಕಾರಣಿಗಳ ಚಾನಲ್‌ಗಳಾಗಿರುವುದನ್ನು ಅವರ ಜಾಹೀರಾತುಗಳು ಪರೋಕ್ಷವಾಗಿ ಲೇವಡಿ ಮಾಡುತ್ತವೆ. ತಮ್ಮ ಚಾನಲ್ ಯಾರ ಆಸ್ತಿಯೂ ಅಲ್ಲ, ಜನರದ್ದು ಎಂದು ಹೇಳುವ ಹಿನ್ನೆಲೆಯಲ್ಲಿ ತಮ್ಮದು ಸ್ವತಂತ್ರ ಕಾರ್ಯನಿರ್ವಹಣೆಯ ಚಾನಲ್ ಎಂದು ಹೇಳುವ ಉದ್ದೇಶವೂ ಇದ್ದಂತಿದೆ.

ಎಲ್ಲ ಸರಿ, ಆದರೆ ಈ ಆಕ್ಟಿವಿಸಂ ವರ್ಕ್ ಔಟ್ ಆಗುತ್ತದೆಯೇ ಎಂಬುದು ಮುಖ್ಯ ಪ್ರಶ್ನೆ. ಚಾನಲ್ ಸೊಗಸಾಗಿ ತರುವುದೊಂದೇ ಅದರ ಯಶಸ್ಸಿಗೆ ಮಾರ್ಗವಾಗುವುದಿಲ್ಲ. ಟಿವಿ ಚಾನಲ್‌ಗಳು ಕೇಬಲ್ ಆಪರೇಟರ್‌ಗಳನ್ನು ಒಲಿಸಿಕೊಳ್ಳಬೇಕು. ಅವರಿಗೆ ಕಾಲಕಾಲಕ್ಕೆ ದಕ್ಷಿಣೆ ನೀಡಬೇಕು. ಕೆಲವು ಕೇಬಲ್ ನೆಟ್ ವರ್ಕ್‌ಗಳು ನೇರವಾಗಿ ಎದುರಾಳಿ ಚಾನಲ್‌ಗಳ ಮಾಲೀಕರ ನಿಯಂತ್ರಣದಲ್ಲೇ ಇವೆ. ಹೀಗಾಗಿ ಪ್ರೈಮ್ ಬ್ಯಾಂಡ್ ನಲ್ಲಿ ಚಾನಲ್ ಪ್ರಸಾರವಾಗುವಂತೆ ನೋಡಿಕೊಳ್ಳುವುದು ಸುಲಭದ ವಿಷಯವಲ್ಲ. ಕನೆಕ್ಟಿವಿಟಿ ಇಲ್ಲದಿದ್ದರೆ ಚಾನಲ್ ಸಿಬ್ಬಂದಿ ಎಷ್ಟೇ ಹೆಣಗಾಡಿದರೂ ಟಿಆರ್‌ಪಿ ಗಿಟ್ಟುವುದಿಲ್ಲ. ಆರಂಭದಲ್ಲಿ ಸುವರ್ಣ ನ್ಯೂಸ್ ಈ ಸಮಸ್ಯೆಗೆ ಬಳಲಿ ಹೋಗಿತ್ತು, ಈಗ ಸಮಯ ಟಿವಿ ಇನ್ನೂ ಕನೆಕ್ಟಿವಿಟಿಯ ಸಮಸ್ಯೆಯಿಂದ ಹೊರಗೆ ಬಂದಿಲ್ಲ.

ಎಲ್ಲ ಸರಿ ಮಾಡಿಕೊಂಡು ಚಾನಲ್ ಆರಂಭಿಸಿದರೂ, ಮಾಡಿದ ಕಾರ್ಯಕ್ರಮಗಳು ಜನರಿಗೆ ಇಷ್ಟವಾಗಬೇಕು. ಜನರ ಇಷ್ಟಗಳೆಲ್ಲವೂ ಒಳ್ಳೆಯ ಅಭಿರುಚಿಯದ್ದೇ ಆಗಿರಬೇಕಿಲ್ಲ. ಸ್ಪರ್ಧೆ ಮಾಡುವ ಚಾನಲ್‌ಗಳು ನಡೆಸುವ ಚೀಪ್ ಗಿಮಿಕ್‌ಗಳನ್ನು ಅನಿವಾರ್ಯವಾಗಿ ಅನುಸರಿಸುವ ಸಂದರ್ಭಗಳೂ ಬರಬಹುದು. ಇಲ್ಲಿ ಆದರ್ಶ, ಸಾಮಾಜಿಕ ಕಳಕಳಿ ಇಂಥವಕ್ಕೆ ಅರ್ಥಗಳು ಉಳಿದಿಲ್ಲ.

ಪಬ್ಲಿಕ್ ಟಿವಿಯ ಹೆಸರಲ್ಲಿ ಬರುತ್ತಿರುವ ರಂಗಣ್ಣ ಎದುರಿಸಬೇಕಾದ ಸಮಸ್ಯೆಗಳು ಇವು. ಅವರಿಗೆ ಯಶಸ್ಸಾಗಲಿ. ನಿಜಕ್ಕೂ ಅದು ಜನರ ಟಿವಿಯಾಗಲಿ.